ირაოსა და კულტურული მემკვიდრეობის დაცვის ეროვნულ სააგენტოს შორის ურთიერთთანამშრომლობის მემორანდუმი გაფორმდა

Posted in სიახლეები

სადაზღვევო კომპანია ირაოსა და კულტურული  მემკვიდრეობის  დაცვის ეროვნულ სააგენტოს შორის ურთიერთთანამშრომლობის მემორანდუმი გაფორმდა



13 სექტემბერს, ვარძიაში, სადაზღვევო კომპანია ირაოსა და კულტურული  მემკვიდრეობის  დაცვის ეროვნულ სააგენტოს შორის გაფორმდა მემორანდუმი, რომელიც ითვალისწინებს თანამშრომლობას შეზღუდული შესაძლებლობების მქონე პირებთან დაკავშირებული სოციალური პროექტების განხორციელებას.

 

ვარძიის სარეაბილიტაციო პროექტის ფარგლებში - საქართველოში პირველად, ინკლუზიური ტურიზმის განვითარებისთვის სამუშაოების დაწყება  იგეგმება. რის შედეგადაც, ვარძიის კომპლექსის ინფრასტრუქტურა გახდება ადაპტირებული შშმ პირებისათვის და მათ ვარძიის კომპლექსის  დათვალიერება შეეძლებათ.

 

მემორანდუმის ხელმოწერის ფარგლებში ვარძიაში იმყოფებოდნენ სადაზღვევო კომპანია ირაოს გენერალური დირექტორი ვახტანგ დეკანოსიძე, საქართველოს კულტურისა და ძეგლთა დაცვის მინისტრი მიხეილ გიორგაძე და საქართველოს კულტურული მემკვიდრეობის დაცვის ეროვნული სააგენტოს გენერალური დირექტორი ნიკოლოზ ანთიძე, რომლებიც ადგილზე ასევე მიმდინარე სარეაბილიტაციო სამუშაოებს გაეცნენ.

 

„ირაოს“ გენერალური დირექტორის ვახტანგ დეკანოსიძის განცხადებით: „როგორც კერძო სექტორის წარმომადგენლები, ჩვენ კარგად ვათვიცნობიერებთ კორპორატიული სოციალური პასუხისმგებლობის მნიშვნელბას ჩვენი საზოგადოების კეთილდღეობისათვის. ამასთან დაკავშირებით, უკანასკნელი წლების განმავლობაში ჩვენ აქტიურად ვახორციელებთ სოციალურ პროექტებს, რომელიც  სიმსივნით დაავადებულ ბავშვებს უკავშირდება. ხოლო დღეს,  ირაოსა და კულტურული მემკვიდრეობის დაცვის ეროვნულ სააგენტოს შორის გაფორმდა მემორანდუმი, რომლის ფარგელბში ჩვენ ვითანამშრომლებთ ისეთი  სოციალური პროექტების ჭრილში, რომლებიც უკავშირდება შშმ პირებს და რომელთა შედეგად ამ ადამიანებს ექნებათ შესაძლებლობა ყოველგვარი შეფერხების გარეშე დაათვალიერონ ვარძიის ღირსშესანიშნაობები.“

 

ქართული არქიტექტურის ექსპოზიცია ვენაში

Posted in სიახლეები

 

10 მარტიდან ქ. ვენაში გაიხსნა საქართველოს არქიტექტურის გამოფენა -„კონტინენტების გადაკვეთაზე“, რომლის ორგანიზატორია „ვენის სადაზღვევო ჯგუფი“. გამოფენა ეძღვნება საქართველოს დამოუკიდებლობის 25 წლის საიუბილეო თარიღს. 
ექსპოზიციაზე წარმოდგენილია თბილისის არქიტექტურის ნიმუშები მე-19 საუკუნის ბოლოდან დღემდე, მათ შორის, ევროპული არქიტექტურის გავლენით აგებული, ასევე მე-20 საუკუნის საბჭოთა არქიტექტურის შენობები და საერთაშორისოდ აღიარებული მრავალი ნაგებობა, არქიტექტურული განვითარების რამდენიმე ეტაპის ამსახველი 60 დიდი ფორმატის ფოტოს სახით. დარბაზის კედლებზე წარმოდგენილია ძველი თბილისის სცენები, რომ დამთვალიერებელმა უკეთ გაიაზროს ისტორიული კონტექსტი, ცენტრალურ ადგილას კი - დამონტაჟებულია თანამედროვე ქალაქის ამსახველი პანორამა. საგამოფენო დარბაზში წარმოდგენილია დიდი ზომის მოდელები და სამგანზომილებიანი ობიექტები, სხვადასხვა ისტორიული დოკუმენტების ორიგინალები: რუკები, ფოტოები, არქიტექტურული ჩანახატები, ბარათები, წიგნები და ჟურნალები. დამთვალიერებელს საშუალება აქვს გაეცნოს გამოფენის კატალოგს, სრული ფოტომასალით და ინფორმაციით. ექსპოზიციის კონცეფცია ადოლფ შტილერს ეკუთვნის.
გამოფენის გახსნის ცერემონიაზე საზოგადოებას ოფიციალური სიტყვით მიმართა ვენის სადაზღვევო ჯგუფის სამეთვალყურეო საბჭოს თავმჯდომარემ - გიუნტერ გაიერმა, ასევე საქართველოს საგარეო საქმეთა მინისტრის მოადგილემ გიგი გიგიაძემ. გამოფენის გახსნას ასევე ესწრებოდნენ ავსტრიის რესპუბლიკაში საქართველოს ელჩი კონსტანტინე ზალდასტანიშვილი, „ვენის სადაზღვევო ჯგუფის“ წევრი კომპანიების: ირაოსა და ჯიპიაი ჰოლდინგის წარმომადგენლები. 
„აღნიშნული ექსპოზიცია განსაკუთრებით მნიშვნელოვანია საქართველოს პოზიციონირებისათვის ავსტრიასა და ევროპაში, იმდენად რამდენადაც უკანასკნელი წლების განმავლობაში ჩვენი ქვეყნისათვის ერთ-ერთი უმთავრესი პრიორიტეტია ევროპულ ოჯახში ინტეგრირება“, - განაცხადა სადაზღვევო კომპანია „ირაოს“ გენერალურმა დირექტორმა ვახტანგ დეკანოსიძემ.
აღნიშნული გამოფენა ქ. ვენაში, ვენის სადაზღვევო ჯგუფის სათაო ოფისის, რინგტურმის საგამოფენო სივრცეში 27 აპრილამდე გაგრძელდება.
 
დაწვრილებითი ინფორმაციისთვის შეგიძლიათ ეწვიოთ:
http://www.vig.com/en/press/architektur-im-ringturm/detail/tbilisi.html?tx_ttnews%5Byear%5D=2016